BASTORI

Asek Dengar Lagu di HP, Tahalele Dapa Cucu deng Piso Tali Poro Kaluar

ilustrasi

AMBON,SERAMBIMALUKU.com-Maryano Tahalele, orang Negri Amahusu, Kecamatan Nusaniwe dapa bawa lari ka rumah saki tagal akang ana dapa cucu deng piso pas di dia pung poro bagiang kiri. Laki-laki yang tikang dapa tahu berinisial JA, orang di kompleks Taman Makmur, Air Salobar.

Kajadiang yang berlangsung pada Selasa (26/9/2017) tengah malam buta sekira pukul 24.30 WIT itu biking korban pung taliporo (usus) sampe kaluar. Sebelum kajadiang itu berlangsung, korban sementara asek barmaeng dia pung HP sambil dengar lagu.

Informasi yang Serambi Maluku.com tarima, kajdiang itu berawal waktu korban, pelaku deng pemilik kios H ada dudu bacarita di muka kios tempat kajadiang. Tiba-tiba ada sopir oto Kudamati singgah lalu bali air mineral. Seng tahu tagal apa, pelaku langsung cucu korban deng piso.

“Saat pemilik kios masuk untuk mengambil air mineral tiba-tiba pelaku langsung menikam korban. Saksi sempat mendengar korban berteriak minta tolong,”kata sumber itu.

Abis cucu korban deng piso, pelaku langsung lari basambunyi, sedangkan korban langsung jatuh ponoh dara. Saat itu korban yang su dalam kondisi seng berdaya langsung dapa bawa ka rumah saki dr Haulussy Ambon deng mobil angkot for dapa kasih bae.

Sumber itu bilang, kasus ini sakarang su ditangan polisi. Untuk mengebangkan kasus ini polisi su minta keterangan dar sejumlah saksi, termasuk juga korban. Polisi sandiri sampe sakarang masih caritahu kasus ini akang pung akar masalah apa.

“Saat ini penyebab penganiayaan ini masih diselidiki, pelaku juga masih dikejar,”ucap sumber itu. (SMG)

Click to comment

BERITA POPULER

To Top