BASTORI

Harga Cili Pung Padis, Mama-mama Kapanasang Tar Bisa Tahang

AMBON-Harga cili yang dijual para pedagang di pasar Mardika dan Batu Merah su amper tar maso akal, bagimana seng, untuk 1 kilogram cili saja, mama-mama dong harus kas kaluar kepeng sampe Rp150.000. Harga cili yang sangat ‘padis’ ini akhirnya biking saparu mama-mama dong seng tahang kapanasang.

“Harga cili kali ini sutalalu tinggi lai, tuangampong bu ee bisa-bisa uang belanja ni hanya par bali akang cili ni saja,”kata Marsela deng logat Saparua kantal saat bakudapa  di pasar Mardika Ambon, Senin (6/3/2017).

Marsela bilang, sampe oras ini dia baru pernah dapa harga cili nai kaya sakarang, sebelumnya dia bilang harga cili seng pernah nai sampe kaya bagini. Menurut Marsela pemerintah kota Ambon sebaiknya ambe sikap, kalu seng kondisi itu akang semakin bikin susah.

“La pemerntah dong biking sapa saja bu, harusnya dong bantu kas turung harga ni,”ujarnya.

Warga yang laeng, Ida mangaku su seng mampu bali cili lai karna akang pung harga su talalu tinggi, dia bilang harga cili su biking takiri-kiri, tagal dong papalele akang deng harga paleng seng masu akal.

“Loko seng usah bali cili jua, talalu mahal lai,”kata Ida langsung pigi.

Menanggapi tingginya harga cili di Kota Ambon, Kepala Bidang Perdagangan Dinas Perindustrian dan Perdagangan (Disperindag) Kota Ambon, Rina Silooy mangaku kalu harga cili yang tinggi itu akang nai karna dipengaruhi faktor cuaca buruk.

“Jadi memang kondisi per hari ini kondisi cabai memang dalam kondisi yang cukup sulit, ini karena cuaca buruk,” ujar Silooy saat berbincang dengan wartawan di Balai Kota Ambon, Senin(6/3/2017).

Antua bilang, faktor cuaca buruk juga mempengaruhi pengiriman cili antar pulau maupun di kota Ambon ikut tersendat. Permintaan cili saat ini memang paleng banyak, mar persedian stok cili kata dia paleng terbatas.

“Cabai yang dipasok dari dalam juga tersendat karena faktor cuaca. Pasokan di luar Kota Ambon seperti Pulau Buru itu terhambat karena faktor cuaca. Hasil produksi pedagang juga dikirimkan antar pulau baik ke Kota Jakarta maupun Kota Surabaya pun juga sedikit terkendala,”cetusnya. (SMN)

Click to comment

BERITA POPULER

To Top