BASTORI

Mabo Nai Otak, Karim Torana Arman Wally Sampe Kumur-Kumur Darah

Kapolsek Sirimau, AKP W Minanlarat

AMBON,SERAMBIMALUKU.com-Mabo jaga biking orang takiri-kiri lalu warmus sabarang, sama deng Karim, tagal sopi pung maeng, dia torana Arman Wally sampe bangke bengke.

Arman Wally , ana kompleks IAIN Ambon, Nagri Batu Merah Kecamatan,Sirimau Ambon dapa parmak sampe nyonyor dar Karim deng dia pung tamang Munir saat korban ada barmaeng deng dia pung tamang seng jauh dar dia pung tampa tinggal, Kamis (17/8/2017).

Tagal palungku masuk pol-pol Arman pung dalam muka langsung bangka, dia pung pelipis mata jua luka termasuk tarobe di pipi kanan. Seng hanya itu Arman juga sampe kumur-kumur darah.

Informasi yang Serambi Maluku dapa, Karim yang waktu itu ada mabo datang ka dong dua lalu tiba-tiba seng ada angin seng ada ujang dia buang bahasa par Arman tua Bangka bodo-bodo e.

Arman yang seng tarima deng kata itu, langsung bale bahasa par Karim Ose bilang apa tadi?. Dari situ Karim yang su emosi langsung pigi bawa pulang dia pung ade dan seng lama dia langsung bale.

“Dia bale deng dia pung tamang nama Munir waktu itu Karim langsung pukul Arman dar dalam muka ulang-ulang,”kata DS salah satu saksi yang lia kajadiang itu, Jumat (18/8/2017).

DS mangaku kajadian itu pas abis Isya sekitar jam jam 20.30 WIT. Waktu itu Karim yang dalam kondisi ‘sadap’ seng pake tanya langsung torana Arman. Dia jua bilang kalu saat itu Munir iko rame krep Arman dar balakang lalu Karim tinggalpukuliko suka.

“Munir bantu karim lai, jadi Munir pung tugas krep sedangkan Karim tinggal pukul,”kata DS.

Setelah kajadang itu, Munir deng Karim langsung pigi, sedangkan Arman yang seng ambe bae langsung pi lapor ka Polsek Sirimau.

Kapolsek Sirimau AKP W Minanlarat mangaku kasus itu dong sutangani akang sakarang. Paitua bilang kasus itu akang terjadi tagal salah paham anatar korban dan pelaku yang sama-sama mabo akibat minom sopi.

“Kasusnya kekerasan itu terjadi karena salah paham antara korban dan pelaku yang dalam kondisi mabuk,”katanya.

Paitua bilang saat ini dong dua pelaku yakni Munir deng Karim sakarang masih dapa iko dar polisi untuk tanggung dong pung perbuatan,”Kedua pelaku masih dicari polisi,”ujarnya (SMN)

Click to comment

BERITA POPULER

To Top